حكايه زوجه الفصل الثامن

ساعة او ساعتين وبأذن الله مفيش حاجة تيجي هنا تاني .
رجع الهدوء للبيت مرة تانية واتفقت مع نجلاء انها لازم تشغل قران كل يوم علي الاقل ساعة الصبح وساعة اخر النهار .
وفي يوم حسيت بمغص شديد مش قدرت اتحمله ولما طلبت الدكتور قالي انه اشتباه في التهاب الزايدة ونقلني للمستشفي فورا .
في المستشفي عملت العملية ولما فوقت من البنج لقيت نجلاء ووحيد ومراته جنبي .
استعجبت وسألت وحيد انت عرفت ازاي 
طنط نجلاء اتصلت بيا و عرفتني .
مكنش له لزوم تيجي وتتعب نفسك دي عملية بسيطة مش مستاهله .
ازاي يا بابا تقول كده !! ده انت طول عمرك پتخاف علينا وتراعينا ولازم نكون جنبك في وقت زي ده .
ونور اخوك فين 
وحيد سكت ومش رضي يتكلم !!
نجلاء قالتلي انا اتصلت باختك ام سلمي وقولتلها وهي زمانها جاية واكيد نور هيكون معها .
بعد ربع ساعة كانت اختي ام سلمي وجوزها عندي في المستشفي لكن نور مش معاهم !!!
ولما سألت عليه اختي حاولت تهرب من السؤال .
تاني يوم خرجت من المستشفي وروحت البيت وهناك وحيد مش رضي يروح بيته وبقي معايا في البيت هو ومراته سلمي .
اختي ام سلمي جت تشوفني تاني يوم وبردو نور مش معاها !!!
سألتها نور مش بييجي معاكي ليه هو مش عرف اني عملت عمليه 
الصراحة يا امير مش عارفة اقولك ايه !!!
اتكلمي نور ماله تعبان ولا حاجة 
لا هو كويس بس احواله هي اللي مش كويسه ابدا .
ازاي فهميني 
نور علطول كان بيقعد لوحده واحنا اتعودنا علي كده لكن الفترة الاخيرة احواله اتغيرت اوي وبقي يعمل حاجات غريبة .
حاجات زي ايه اتكلمي علطول .
نور من اول ما قعد عندي لاحظت انه مش بيصلي حاولت انبهه وقولت ربنا يهديه لكن اللي زاد الفترة الاخيرة انه في رمضان كان بيفطر بالنهار ومش بيرضي يصوم معانا والاغرب كمان ان كل ما اشغل قران ويسمعه يجري ويقفله !!!!!
معقول !!! 
ايوه .
وانتي عملتي معاه ايه 
حاولت اقولهةيصوم وافهم منه بيقفل القران ليه جاوبني بكلام مش فهمت منه اي حاجة .
وبعدين 
معرفش يا امير انا عاوزة اقولك حاجة بس متزعلش مني .
قولي .
انا عاوزة نور يرجع يعيش معاك هنا انت ابوه وتعرف تتكلم معاه وتفهم منه هو ماله اكتر مني .
انتي عندك حق يا اختي لما تروحي قوليله ابوك عاوزك تروحله دلوقتي حالا .
مشيت ام سلمي وناديت علي وحيد وقولتله اخوك نور جاي دلوقتي وانت سمعت كلام عمتك اول ما ييجي تعالي اقعد معانا وحاول تفهم معايا الواد ده ماله .
وفعلا بعد حوالي ساعتين وصل نور وقولتله تعالي يا نور. اقعد .
قعد نور قدامي وسألته انت مش عرفت اني عملت عمليه الزايدة 
ايوه عرفت .
ومش جيت تتطمن عليا يا نور 
كنت بطمن
عليك من عمتي .
مش المفروض تيجي تشوفني بنفسك !!
مش عاوز اقلقك وقولت اسيبك مرتاح .
انا ارتاح يا نور لما اطمن عليك وعلي اخواتك انما بعدك عني واحوالك بالشكل ده هو اللي يقلقني بجد .
مش فاهم .
انت لازم ترجع تعيش معايا هنا .
لأ معلش انا مرتاح عند عمتي .
عمتك ظروفها اتغيرت ومش هينفع تقعد عندها تاني بعد كده اخوك وحيد هيروح يجيب حاجاتك من هناك علشان تعيش هنا في بيتك .
يا بابا مش هينفعش .
وحيد قاطع نور في كلامه وقاله ابوك عنده حق يا نور وانا كمان هجي اعيش معاكم هنا ونعيش كلنا مع بعض تاني .
يا وحيد ..
خلاص يا نور بلاش كلام كتير علشان ابوك تعبان دلوقتي وعمتك نفسها هي اللي طلبت من ابوك كده .
وفعلا نور ووحيد راحوا عند عمتهم وجابوا
يتبع