قصه كامله
هستناك لما ترجع الفندق.
ماتهزريش أنا جايز أرجع الفندق ع العصر هتسهري كل ده!
مش هيجي لي قلب أرتاح و أنت متشحطط بره بيتك.
بټعذبي نفسك يعني!
بشاركك! عايزة أشاركك تعبك و مجهودك و ده اللي ف إيدي.
إنك ما تناميش!
إني مانامش غير لما أطمن عليك إنك خلصت شغلك و وصلت الفندق و نمت.
عنيدة و دماغك ناشفة.
بس بحبك!
ف الحب بيكون عندي استعداد أقسي ع نفسي و أجي ع حقها ف سبيل الطرف الآخر.. اللي بعمله جايز مش صح ب نسبة كبيرة.. ماهو أنا سهري مالهوش لازمة مادام مش بشتغل معاه! لكن أنا إحساسي هيخانقني لو نمت و ريحت جسمي و عارفة إنه جسمه هو مش مرتاح! ف إزاي أرتاح!
أخيرا.. حاسس إني مش حاسس بيا أصلا.
طب أكلت!
لما أصحي.
لا يا إبراهيم ماينفعش خد أي حاجة بسرعة قبل ما تنام أنت كده ممكن تصحي الصبح.
كفاية أسئلة و زن و حياتك أنا ھموت و أنام.
اهاا.. ماشي.. تصبح بخير.. باي.
كتبتهم ف مسدچ واحده عشان ماياخدوش وقت و قفلت نت بسرعة قبل ما يرد عليا.. سندت الفون جنبي و راسي ع المخدة غمضت عيني و هنام.. هنام.. بعيط.
أنا كان غرضي أطمن عليك! كان ممكن تختصر وقتك لو قولتلي نبقي ناكل سوا لما أصحي يلا عشان ننام كان رد هينجز و هيراضيني! كنت هسمع الكلام و مش هزن و هسيبك تنام! ماكنش قصدي أقلق منامك ده أنا قالقة منامي عشانك!
مش مشكلة يا حورية.. هو راجع من يوم طويل أكيد مضغوط.. عدي له و عدي اليوم و نامي و هتصحي بكره هيكلمك و هتتصالحوا.
الساعة خمسة الفجر أنا صحيتك زي ما كنت قايل لي.
صحيت..
فاضل ساعتين ع معاد الشغل هتعمل ايه!
مش عارف.. ممكن أشوف حاجة أكلها حاسس بجوع.
اللي يريحك.
لو عايزة ترجعي تكملي نوم روحي عادي أنا هاكل و هلبس و أنزل.
ماشي.
ايه.. هتقفلي!
اهاا هروح أكمل نوم.
ماشي حبيبي نوم الهنا.
الساعة ستة.. أكلت!
أنت مانمتيش!
مجاليش نوم.
اها أكلت.
طيب.
مالك!
عادي.
طب تعالي نتكلم ڤيديو كول.
لأ.
ليه!
هتتأخر ع الشغل يعني.
لا مش هتأخر من كام دقيقة.. يلا.
ماقدرتش أنام من قبل ما أطمن إنه نزل ل شغله.. و ماكنتش عايزة أكلمه لو أداريت ف الشات مش هقدر أداري ملامحي و لا هقدر أضحك ف وشه و أقوله صباح الخير يا روحي زي عوايدي.. هبقي قالبة بو!زي.. و دي مش خلقة يشوفها واحد هيبدأ يومه! بس يستاهل لازم يحس ب ذنبه.
صباح النور.
هوب هوب هوب.. أكيد فيه مشكلة.
مشكلة ايه!
قولتي صباح النور و ده الرد اللي بترديه لما بتكوني مضايقة مني.
حاولت أضحك و أخبي.
يا سلام!
أيوه لما بتبقي راضية عني بتقولي لي يجعل صباحك كله خير
ما أخدتش بالي.
و مش مسرحة شعرك! أنت بتفردي شعرك لما بنتكلم ڤيديو كول دلوقتي عاملاه كحكة يا حورية!
مالها الكحكة!
لا واضح إن فيه شئ كبير أنا عملته مزعلك و واضح إن عنيك تعبانة.. شكلك مانمتيش من إمبارح أصلا!
ماردتش عليه و بصيت بعيد عن الكاميرا.
وقعتك بيضة! أنت مانمتيش!
غفلت حاجة بسيطة.
فيه ايه يا حورية! حصلت حاجة ضايقتك!
لأ.
أنا قولت حاجة ضايقتك!
ماردتش ف فهم.
يبقي قولت.. استني أراجع.
لأ ماينفعش تسترجع ردودك هتتأخر ع شغلك و
